जि.प.शाळा कमलापूर येथे ‘डॉ. सी. व्ही. रामन बालवैज्ञानिक’ परीक्षेचे आयोजन; नावनोंदणी सुरु

सांगोला (प्रतिनिधी):आजच्या धावपळीच्या आणि तंत्रज्ञानाच्या युगात विद्यार्थ्यांमध्ये विज्ञानाची आवड निर्माण व्हावी आणि त्यांच्यातील सृजनशीलतेला वाव मिळावा, या उद्देशाने जनसेवा सामाजिक, सांस्कृतिक, शैक्षणिक प्रतिष्ठान, अहमदनगर यांच्या वतीने प्रतिवर्षाप्रमाणे ‘डॉ. सी. व्ही. रामन बालवैज्ञानिक परीक्षा २०२६’ चे आयोजन करण्यात आले आहे. सांगोला तालुक्यातील जिल्हा परिषद प्राथमिक केंद्र शाळा, कमलापूर येथे या परीक्षेचे अधिकृत केंद्र निश्चित करण्यात आले असून, परिसरातील जास्तीत जास्त विद्यार्थ्यांनी या संधीचा लाभ घ्यावा, असे आवाहन करण्यात आले आहे.

ही परीक्षा इयत्ता ५ वी ते ९ वीच्या विद्यार्थ्यांसाठी असून, याचा मुख्य हेतू विद्यार्थ्यांमधील वैज्ञानिक प्रतिभा शोधून त्यांना शास्त्रज्ञ व तज्ज्ञ व्यक्तींचे मार्गदर्शन उपलब्ध करून देणे हा आहे. केवळ परीक्षा न घेता विद्यार्थ्यांच्या सर्वांगीण वैज्ञानिक विकासावर या उपक्रमाचा भर आहे.

महत्त्वाची वैशिष्ट्ये आणि फायदे:

  या उपक्रमांतर्गत विद्यार्थ्यांना इस्रो (ISRO), नासा (NASA), टाटा इन्स्टिट्यूट मुंबई आणि आयसर (IISER) यांसारख्या जागतिक कीर्तीच्या संस्थांमधील शास्त्रज्ञ, कुलगुरू तसेच जिल्हाधिकारी दर्जाच्या मान्यवरांकडून मार्गदर्शन मिळणार आहे. परीक्षेत यशस्वी होणाऱ्या बालवैज्ञानिकांसाठी विशेष विज्ञान कार्यशाळांचे आयोजन केले जाते. यामध्ये विद्यार्थी स्वतः नाविन्यपूर्ण उपकरणे तयार करायला शिकतात.

विज्ञानातील क्लिष्ट संकल्पना सोप्या पद्धतीने मांडण्यासाठी विज्ञान नाटिकांचेही आयोजन करण्यात येते.गुणवत्ताधारक विद्यार्थ्यांना मान्यवरांच्या हस्ते सन्मानचिन्ह व प्रमाणपत्र देऊन गौरविण्यात येते, ज्यामुळे विद्यार्थ्यांचा आत्मविश्वास वाढण्यास मदत होते.

मागील वर्षाचा आढावा घेतला असता, राज्य, जिल्हा व तालुका गुणवत्ता यादीतील एकूण ११५० बालवैज्ञानिक कार्यशाळेसाठी पात्र ठरले होते. यंदा हा आकडा अधिक वाढण्याची शक्यता वर्तवली जात आहे.

या परीक्षेसाठी ऑनलाईन नावनोंदणी प्रक्रिया सुरू झाली आहे. इच्छुक विद्यार्थी आणि पालकांनी www.drcvramanexam.in या अधिकृत वेबसाईटवर जाऊन आपला प्रवेश निश्चित करावा.अधिक माहितीसाठी समन्वयक श्री. सुनील आदलिंगे: ९५९५२०६२६३ यांच्याशी संपर्क साधावा:

विज्ञानाची कास धरून स्वतःची प्रगती करू इच्छिणाऱ्या सर्व बालवैज्ञानिकांनी या परीक्षेत सहभागी व्हावे, असे आवाहन केंद्र समन्वयक कमलापूर व जनसेवा प्रतिष्ठानच्या वतीने करण्यात आले आहे.