उपमुख्यमंत्री एकनाथजी शिंदे यांची ‘तोफ’ सांगोल्यात धडाडणार!

नगराध्यक्ष व नगरसेवक उमेदवारांसाठी आज भव्य सभा

सांगोला (प्रतिनिधी): आगामी नगरपालिका निवडणुकीच्या पार्श्वभूमीवर, शिवसेना पक्षाच्या नगराध्यक्ष आणि नगरसेवकपदाच्या उमेदवारांच्या प्रचारार्थ राज्याचे उपमुख्यमंत्री एकनाथजी शिंदे यांची आज सांगोल्यात जाहीर सभा होत आहे. छत्रपती शिवाजी महाराज चौकात, ठीक दुपारी एक वाजता ही सभा होणार असून, संपूर्ण शहराचे लक्ष या सभे कडे लागले आहे.मुख्यमंत्री एकनाथ शिंदे यांच्या सभेमुळे सांगोला नगरीतील राजकीय वातावरण पूर्णपणे ढवळून निघाले आहे.

माजी आमदार शहाजीबापू पाटील यांची ‘जोरदार बॅटिंग’

या निवडणुकीच्या माध्यमातून माजी आमदार अॅड. शहाजीबापू पाटील यांनी जोरदार शक्तिप्रदर्शन करण्यास सुरुवात केली आहे. ते पक्षाच्या उमेदवारांसाठी सक्रियपणे प्रचार करत असून, आजच्या सभेसह त्यांच्या नगरपालिका निवडणुकीतील प्रचाराचा शुभारंभ होणार आहे. शहाजीबापू पाटील आपल्या खास शैलीतील भाषणातून मतदारांना साद घालणार आहेत.

शिवसेनेच्या उमेदवारांसाठी पाठबळ: नगराध्यक्ष आणि नगरसेवकपदाच्या उमेदवारांना उपमुख्यमंत्री शिंदे यांच्या माध्यमातून मोठे बळ मिळणार आहे.

विरोधकांवर निशाणा: या सभेत उपमुख्यमंत्री एकनाथ शिंदे हे विरोधकांच्या कारभारावर टीका करण्याची शक्यता आहे.

विकासकामांची ग्वाही: सांगोला शहराच्या विकासासाठी महायुती सरकार काय योजना आखत आहे, याबद्दल शिंदे मार्गदर्शन करण्याची शक्यता आहे.

या सभेमुळे सांगोल्याच्या नगरपालिका निवडणुकीतील लढत अधिकच चुरशीची होणार असल्याचे स्पष्ट झाले आहे.