महामानव डॉ.बाबासाहेब आंबेडकर यांचा पूर्णाकृती पुतळा उभारणे ही सांगोल्याच्या इतिहासातील अभिमानाची गोष्ट ः आमदार डॉ.बाबासाहेब देशमुख

देशाला समता स्वातंत्र्यय आणि बंधुत्व ज्यांनी संविधानाच्या माध्यमातून दिले असे महामानव भारतरत्न परमपूज्य डॉ.बाबासाहेब आंबेडकर यांचा पूर्णाकृती पुतळा सांगोला शहरामध्ये उभारणे ही सांगोल्याचे इतिहासामधील अभिमानाची गोष्ट आहे. आज डॉक्टर बाबासाहेब आंबेडकर यांच्या माता भिमाई आंबेडकर यांच्या जयंतीचे औचित्य साधून भारत देशाचे सुपुत्र भारतरत्न डॉ. बाबासाहेब आंबेडकर यांचा पूर्णाकृती पुतळा चबुतर्‍यावर उभा करताना अभिमान वाटत आहे. असे मत सांगोल्याचे विद्यमान आमदार डॉ. बाबासाहेब देशमुख यांनी व्यक्त केले.

यावेळी व्यासपीठावर सांगोल्याचे माजी आमदार शहाजीबापू पाटील, भंते संबोधी व भंते गोविंद मानदो, सांगोल्याचे माजी नगराध्यक्ष रफिकभाई नदाफ यांच्यासह डॉ. बाबासाहेब आंबेडकर जयंती उत्सव मंडळाचे पदाधिकारी, कार्यकर्ते विविध क्षेत्रातील मान्यवर मोठ्या संख्येने उपस्थित होते.

शुक्रवार 14 फेब्रुवारी 2025 रोजी महामाता भिमाई रामजी आंबेडकर यांच्या 171 व्या जयंती दिनानिमित्त विश्‍वरत्न विश्‍वभूषण डॉ. बाबासाहेब आंबेडकर यांच्या पूर्णाकृती पुतळ्याचे सांगोला शहरात मुंबईहून आगमन झाले. यावेळी महामाता भिमाई यांची व डॉ.बाबासाहेब आंबेडकर यांच्या प्रतिमेची रॅली काढत सांगोला शहरातील सर्व महापुरूषांच्या पुतळ्यास पुष्पहार अर्पण करत डॉ.बाबासाहेब आंबेडकर यांच्या पुतळ्याचे सांगोला शहरात जयघोषात, उत्साहपूर्ण वातावणात, जल्लोषात स्वागत करण्यात आले.

त्यानंतर डॉ. बाबासाहेब आंबेडकर उद्यान येथील भव्य स्मारकामधील चबुतर्‍यावर डॉ बाबासाहेब आंबेडकर यांचा पुतळा उभारण्यात येणार आहे. दुपारी 3 वाजता डॉ. बाबासाहेब आंबेडकर यांच्या अस्थीचे धम्मविधी करण्यात येणार आहे. हा धम्मविधी कोल्हापूरचे भंतो संबोधी व गुगुवाड ता. जत, जि. सांगली येथील भंतो गोविंदो मानदो यांनी केले.

पुढे बोलताना आमदार डॉ. बाबासाहेब देशमुख म्हणाले की, सांगोला तालुक्यात 60 वर्षे प्रतिनिधित्व करत असताना सर्व जाती धर्म यांना सोबत घेऊन तालुका शांततेत राहिला पाहिजे यासाठी कष्ट घेतलेले स्वर्गीय आमदार डॉ. गणपतराव देशमुख यांनी 1978 साली सांगोला शहरात डॉ. बाबासाहेब आंबेडकरांच्या अर्धाकृती पुतळ्याची स्थापना केली होती. त्यानंतर 2019 ते 2024 या दरम्यान मा. आमदार शहाजीबापू पाटील यांनी सांगोला शहरात डॉ. बाबासाहेब आंबेडकर यांचा पूर्णाकृती पुतळा उभारणीसाठी जबाबदारी उचलून या ठिकाणी स्मारकासाठी निधी उपलब्ध करून दिला ही सांगोल्याच्या इतिहासातील अभिमानाची गोष्ट आहे. भविष्यात डॉ. बाबासाहेब आंबेडकरांचा विचार टिकला पाहिजे, संविधान टिकले पाहिजे यासाठी आपण प्रयत्नशील राहूया. यापुढे डॉ. बाबासाहेब आंबेडकर यांच्या पुतळ्याच्या सुशोभीकरणासाठी जो काही निधी लागेल, तो पूर्ण निधी मी देण्यासाठी कटिबद्ध असल्याचे डॉ. बाबासाहेब देशमुख यांनी सांगितले.

यावेळी माजी आमदार अ‍ॅड.शहाजीबापू पाटील यांनी डॉ.बाबासाहेब आंबेडकर यांच्या पुतळ्याच्या सुशोभिकरणासाठी भरघोस निधी उपलब्ध करून दिल्याबद्दल त्यांचे जयंती उत्सव मंडळाच्यावतीने आभार मानण्यात आले.

गतवर्षी सांगोला शहरात छत्रपती शिवाजी महाराज यांच्या अश्‍वारूढ पुतळ्याचे आगमन झाले यंदाच्या वर्षी सुरुवातीलाच भारतरत्न डॉ बाबासाहेब आंबेडकर यांच्या पूर्णाकृती पुतळ्याचे आगमन झाले त्यामुळे दोन्ही महापुरुषांच्या आगमनाने सांगोलकरांचा आनंद गगनात मावेनासा झाला. सांगोला येथील माजी आमदार दिपकआबा साळुंखे पाटील यांच्या संपर्क कार्यालयासमोर भारतरत्न डॉ. बाबासाहेब आंबेडकर यांच्या पूर्णाकृती पुतळ्याचे माजी आमदार दिपकआबा साळुंखे पाटील यांनी पुतळ्यास पुष्पहार अर्पण करून जेसीबीमधून पुतळ्यावर पुष्पवृष्टी केली. तसेच शहरात ठिकठिकाणी भिम अनुयायी यांनी डॉ.बाबासाहेब आंबेडकर यांच्या पुतळ्याचे पुष्पवृष्टी करून स्वागत केले.

हा कार्यक्रम यशस्वी करण्यासाठी भारतरत्न डॉ. बाबासाहेब आंबेडकर जयंती उत्सव मंडळ रजिस्टर कार्यकारिणीचे अध्यक्ष तानाजी श्रीरंग बनसोडे, खजिनदार सितारामआबा विश्‍वनाथ बनसोडे, सेक्रेटरी बाळासाहेब संदीपान बनसोडे, उपाध्यक्ष अप्सरा सोमनाथ ठोकळे, उपाध्यक्ष मैना प्रशांत बनसोडे, सहसचिव रुपेश जगन्नाथ बनसोडे, संचालिका विजयाताई बाबासो बनसोडे, संचालक दीपक मनोहर बनसोडे, रामस्वरूप दगडू बनसोडे, सतीश पोपट बनसोडे, कुंदन फुलचंद बनसोडे, जगदीश यशवंत भरकडे, किशोर बाबुराव बनसोडे, सोपान आप्पा बनसोडे, मिलिंद रेवन बनसोडे, प्रशांत बबन धनवजीर, सुभाष धोंडीराम बनसोडे, महादेव वसंत बनसोडे, उमेश शंकर बनसोडे, मोहन हिराप्पा गुडदौरू धम्म मित्र बापूसाहेब चंदू ठोकळे, तज्ञ संचालक अ‍ॅड. आनंदा जगन्नाथ बनसोडे, तज्ञ संचालक अ‍ॅड. सागर अंबादास बनसोडे आदींसह समस्त बहुजन समाज सांगोला तालुका यांनी परिश्रम घेतले.