श्री ब्रह्मचैतन्य गोंदवलेकर महाराज यांचा पुण्यतिथी उत्सव भक्तीभावात संपन्न 

सांगोला ( प्रतिनिधी )- श्री समर्थ सद्‌गुरु ब्रह्मचैतन्य महाराज गोंदवलेकरांचा १११ वा पुण्यतिथी उत्सव श्रीराम मंदिर व ध्यानमंदिर,सांगोला येथे दि. १६ डिसेंबर ते दि. २५ डिसेंबर २०२४ दरम्यान साजरा केला गेला. यानिमित्त भीक्षा, भजन, मौन, गायन, कीर्तन, प्रवचन, उपासना, अखंड १३ तासाचा जप इ. कार्यक्रम पार पडले.  दररोज सकाळी ६ वा. काकडा व सामुदायिक जप राममंदिर येथे संपन्न झाला.

पंढरपूर येथील ह.भ.प. डॉ. जयवंत महाराज बोधले यांचे  “राम म्हणता रामची होईजे”  या विषयावर ३ दिवस सुश्राव्य अशी प्रवचन माला संपन्न झाली. तसेच सज्जनगड येथील सेवेकरी ह.भ.प. श्री. राघवेंद्रबुवा देशपांडे यांचे नारदीय कीर्तन झाले तर  ह. भ. प. श्री. गुरुनाथ महाराज कोटणीस सांगली यांचे प्रवचन त्याचबरोबर श्री. दयानंद बनकर व त्यांचे सहकाऱ्यांचा भजन संध्या हा भावगीत, भक्तीगीत, अभंग, गौळणीचा बहारदार कार्यक्रमही संपन्न झाला.

बुधवारी श्रीमती शुभांगी कवठेकर यांचे पुण्यतिथीचे कीर्तन व श्रीमहाराजांच्या प्रतिमेवर पुष्पवृष्टी करण्यात आली.श्रीमती कवठेकर यांना तबल्याची साथ श्रीया कुलकर्णी यांनी तर हार्मोनियम साथ शशिकांत लाटणे यांनी केली. सूत्रसंचालन अश्विनी कुलकर्णी यांनी केले. यानंतर महाराजांची पालखी व नगर प्रदक्षिणा शोभायात्रा शहरातील प्रमुख मार्गावरून काढण्यात आली  दुपारी ध्यानमंदिरात आरती व महाप्रसाद होऊन उत्सवाची सांगता झाली.