सांगोला (प्रतिनिधी):सांगोला तालुक्यातील आरोग्य सेवेत मोलाची भर पडली असून, कडलास रोड येथील खंडागळे मल्टीस्पेशालिटी हॉस्पिटलला आता ‘मुख्यमंत्री सहायता निधी’ कक्षाचे संलग्नीकरण प्रमाणपत्र प्राप्त झाले आहे. या निर्णयामुळे सांगोला परिसरातील गरीब आणि गरजू रुग्णांना मोठ्या शस्त्रक्रिया आणि गंभीर आजारांवरील उपचारांसाठी शासनाकडून आर्थिक मदत मिळण्याचा मार्ग मोकळा झाला आहे.
राज्य सरकारच्या मुख्यमंत्री सहायता निधी कक्षामार्फत विविध गंभीर आजारांच्या उपचारांसाठी आर्थिक दुर्बल घटकातील रुग्णांना अर्थसहाय्य दिले जाते. यासाठी ठराविक निकषांची पूर्तता करणाऱ्या रुग्णालयांनाच शासन संलग्नीकृत करते. खंडागळे मल्टीस्पेशालिटी हॉस्पिटलने या सर्व अटी व शर्तींची पूर्तता केल्याने, आता या रुग्णालयात उपचार घेणाऱ्या पात्र रुग्णांना मुख्यमंत्री सहायता निधीचा लाभ घेता येणार आहे.
या संलग्नीकरणाबद्दल माहिती देताना हॉस्पिटलचे डॉ. परेश खंडागळे म्हणाले की, “अनेकदा पैशाअभावी गरीब रुग्ण वेळेवर उपचार घेऊ शकत नाहीत. मुख्यमंत्री सहायता निधीशी संलग्न झाल्यामुळे आता अशा गरजू रुग्णांना आर्थिक बळ मिळेल. आमच्या रुग्णालयातील सर्व आधुनिक वैद्यकीय सुविधा आणि तज्ज्ञ डॉक्टरांची सेवा या योजनेतील रुग्णांसाठी आम्ही सदैव तत्पर ठेवू.”
ज्या रुग्णांची आर्थिक स्थिती कमकुवत आहे.ज्यांच्याकडे पिवळे किंवा केशरी रेशनकार्ड आहे. गंभीर आजार किंवा मोठ्या शस्त्रक्रियांची आवश्यकता असलेल्या रुग्णांना याचा फायदा होणार आहे.
सांगोला आणि आसपासच्या ग्रामीण भागातील नागरिकांनी या सुविधेचा लाभ घ्यावा, असे आवाहन रुग्णालय प्रशासनाकडून करण्यात आले आहे. या निर्णयामुळे परिसरातील सामान्य नागरिकांमध्ये आनंदाचे वातावरण आहे.
सांगोला परिसर आणि राज्यातील बातम्या आणि माहिती सर्वात प्रथम मिळवण्यासाठी तुमच्या Whatsapp ग्रुपवर 78418 55301 हा आमचा नंबर समाविष्ट करा.
-
'सांगोला लाईव्ह'ला बातम्या व जाहिरात देण्यासाठी आजच संपर्क करा : 78418 55301
-
सोशल मीडियावर फॉलो करा -यूट्यूब, इन्स्टाग्राम आणि फेसबुक
