चिमुकल्यांच्या आरोग्यासाठी नृसिंह गणेश मंडळाचा स्तुत्य उपक्रम

झोपडपट्टी परिसरातील चिमुकल्यांची मोफत आरोग्य तपासणी; मोफत औषधोपचाराचे वाटप

सांगोला : गणेशोत्सवाच्या पार्श्वभूमीवर सामाजिक बांधिलकी जपत नृसिंह गणेश तरुण मंडळ, लोहार गल्ली, सांगोला यांच्या वतीने वर्षाच्या २९व्या उत्सवानिमित्त जिल्हा परिषद शाळेतील झोपडपट्टी परिसरातील लहान चिमुकल्यांसाठी मोफत आरोग्य तपासणी शिबिराचे आयोजन करण्यात आले. या उपक्रमातून आर्थिकदृष्ट्या गरजू कुटुंबातील विद्यार्थ्यांना आरोग्य तपासणी व औषधोपचाराची सुविधा मोफत उपलब्ध करून देण्यात आली.

या शिबिरामध्ये बालरोगतज्ज्ञ डॉ. महावीर आलदर यांनी विद्यार्थ्यांची आरोग्य तपासणी केली. विविध आरोग्यविषयक तक्रारींबाबत विद्यार्थ्यांना मार्गदर्शन करत आवश्यक त्या मोफत औषधोपचाराचे वितरण करण्यात आले. लहान मुलांचे आरोग्य, स्वच्छता, आहार आणि आजारांपासून बचाव याबाबतही यावेळी मार्गदर्शन करण्यात आले.

गणेशोत्सवामध्ये केवळ धार्मिक कार्यक्रम व मनोरंजनाला महत्त्व न देता समाजातील गरजू घटकांसाठी विविध सामाजिक उपक्रम राबविण्याचा संकल्प नृसिंह गणेश तरुण मंडळाने केला आहे. त्याचाच एक भाग म्हणून चिमुकल्यांसाठी घेण्यात आलेल्या या आरोग्य तपासणी शिबिराचे उपस्थितांकडून कौतुक करण्यात आले.

यावेळी युवा नेते व मंडळाचे मार्गदर्शक विजय पैलवान, प्रशांत खांडेकर,डॉ. महावीर आलदर, डॉ. पवन शिरसाट, आकाश तोरणे यांच्यासह मंडळाचे पदाधिकारी, कार्यकर्ते व नागरिक मोठ्या संख्येने उपस्थित होते. शिबिराचे सूत्रसंचालन राजेश्वरी कोरे मॅडम यांनी केले.

गणेशोत्सवाच्या माध्यमातून केवळ धार्मिक व मनोरंजनात्मक कार्यक्रम न राबविता गरजू व वंचित घटकांसाठी समाजोपयोगी उपक्रम राबविण्याचा नृसिंह गणेश तरुण मंडळाचा उपक्रम निश्चितच कौतुकास्पद आहे.जिल्हा परिषद प्राथमिक शाळेतील झोपडपट्टी परिसरातील चिमुकल्यांसाठी मोफत आरोग्य तपासणी शिबिर आयोजित करून मंडळाने सामाजिक बांधिलकी जपली आहे. उत्सवाच्या आनंदासोबत समाजसेवेचा संदेश देणारा हा उपक्रम सर्वांसाठी प्रेरणादायी व आदर्शवत असून, इतर गणेश मंडळांनीही अशा समाजोपयोगी उपक्रमांचे अनुकरण करावे, अशी भावना यावेळी व्यक्त करण्यात आली.

 नृसिंह गणेश तरुण मंडळाचा सामाजिक उपक्रम कौतुकास्पद

गणेशोत्सवाच्या माध्यमातून केवळ उत्सव साजरा न करता गरजू व वंचित घटकांसाठी समाजोपयोगी उपक्रम राबविण्याचा नृसिंह गणेश तरुण मंडळाचा उपक्रम निश्चितच कौतुकास्पद आहे. चिमुकल्यांसाठी मोफत आरोग्य तपासणी शिबिर, मोफत औषधोपचार यांसारख्या उपक्रमातून मंडळाने सामाजिक बांधिलकी जपली आहे.

डॉ.महावीर आलदर, बालरोग तज्ञ, सांगोला

 उत्सवातून आरोग्यसेवेचा संदेश….

गणेशोत्सव हा केवळ धार्मिक उत्सव न राहता समाजातील गरजू घटकांच्या मदतीचा माध्यम ठरावा, या उद्देशाने नृसिंह गणेश तरुण मंडळाने चिमुकल्यांसाठी मोफत आरोग्य तपासणी शिबिर आयोजित केले. आर्थिक परिस्थितीमुळे आरोग्यसेवेपासून वंचित राहणाऱ्या विद्यार्थ्यांना डॉक्टरांचा सल्ला, तपासणी आणि आवश्यक औषधोपचार मोफत मिळणे ही या उपक्रमाची विशेष बाब आहे. उत्सवाच्या आनंदासोबत आरोग्यसेवेची जोड देणारा मंडळाचा हा उपक्रम समाजासाठी अनुकरणीय आहे.

— विजय पैलवान, युवा नेते व मंडळाचे मार्गदर्शक